Skip to main content

பிழைக்கத் தெரியாத மனிதர்!

மருதம் என்றொரு பதிப்பகத்தை பல வருடங்களாக நடத்திவரும் ராஜேந்திரன் அய்யாவை இன்று அவரது இல்லத்தில் சந்தித்தேன். என் நண்பர் தமிழோவியன் தான் புதிதாக துவங்க உள்ள பத்திரிகைக்காக ஆலோசனை பெறவேண்டும் என்றுச் சொல்லி என்னையும் அவருடன் அழைத்துச்சென்றார். நெய்வேலியிலிருந்து கொஞ்சம் வெளியே அடர்ந்திருக்கும் முந்திரி தோப்புகளுக்கு மத்தியில் உள்ள பெரிய காப்பான்குளம் எனும் கிராமத்தில்தான் அவரது வீடு. பதிப்பாளர் என்றதும் வசதி வாய்ப்புகளுடன் சுகமாக வாழந்துகொண்டிருப்பார் என்றுதான் முதலில் எண்ணியிருந்தேன். பைக்கில் சென்றுகொண்டிருந்தபோது நண்பர்கூட ராஜேந்திரன் அய்யாவை பற்றி எந்தவொரு முன்னுரையும் கொடுத்திருக்கவில்லை. ஆனால் சீராக சென்றுகொண்டிருந்த பைக் மிக சிறிய ஓட்டு வீட்டொன்றின் முன்னால் பிரேக் அடித்த நிற்க, நண்பர் இதுதான் அய்யாவின் வீடென்றதும் பெரும் வியப்பாக இருந்தது. 

எழுத்தாளர்கள் பலர் இதுபோன்ற, இதைவிடவும் வசதி குன்றிய வீடுகளில் வசிப்பதைப் பார்த்திருக்கிறேன். ஆனால் எந்த பதிப்பாளரும் இப்படி இரண்டே இரண்டு அறைகள் உள்ள வீட்டில் ஒடுங்கி வாழ்வதை பார்த்ததில்லை. அந்த இரு அறைகளில் ஒரு அறை முழுவதும் புத்தகங்களால் நிரம்பியிருந்தது. புத்தகங்கள் அண்டிக்கிடந்த அந்த அறையில் பாய் வீசி பேசத்துவங்கினோம். விரைவில் முடித்துக்கொள்ளவேண்டும் என்கிற நிபந்தனையுடனேயே துவங்கிய உரையாடல் எங்களையும் மீறி, நேரம் போவதே தெரியாமல் சில மணி நேரங்கள் நீண்டது. தான் சந்தித்த மனிதர்கள், எழுத்தாளர்கள் (அதில் சிலர் இப்போது உச்சத்தில் உள்ளனர்), அவர்களுடனான சம்பாஷணைகள் என்று பல விஷயங்களை பகிர்ந்துக்கொண்டார். அதில் பல ஆச்சர்யமாகவும், அதிர்ச்சியாகவும் இருந்தது. தன்னுடைய பதிப்பகத்தில் வெளியாகியுள்ள பல புத்தகங்கள் எனக்குக் கொடுத்தார். 

தேவதேவனின் மார்கழி என்றொரு கவிதைத் தொகுப்பிலிருந்து, பெயர் அறியப்படாத பல எழுத்தாளர்களும் அவருடைய பதிப்பகத்தில் எழுதியுள்ளார்கள். எழுத்தை நேசிக்கும், இலக்கியத்தை நேசிக்கும் யாராக இருந்தாலும் என் வீட்டு கதவை நம்பிக்கையுடன் தட்டலாம் என்று சொல்லும் ராஜேந்திரன் அய்யா என்.எல்.சியில் ஒப்பந்த தொழிலாளராக பணியாற்றுகிறார். வறுமையையும், துயரத்தையும் சகித்துக்கொண்டு மொழியின் மீதான காதலால் அவர் ஆற்றுகின்ற தமிழ் சேவையை பார்க்கையில் மொழியை வியாபாரமாக்கிவிட்டு எந்தவொரு கூச்சநாச்சமுமின்றி சொகுசாக வாய்ந்துகொண்டிருக்கும் சில பதிப்பாளர்களின் முகம் மனதில் தோன்றி மறைந்தது.

Popular posts from this blog

காட்ஃபாதர் பேசுகிறார்...! பிரான்சிஸ் ஃபோர்ட் கப்பாலோ நேர்காணல் தமிழில்: ராம் முரளி

காட்ஃபாதர் திரைப்படத்தினை இதுவரையிலும் பத்துக்கும் மேற்பட்ட முறையாவது பார்த்திருப்பேன். ஒருபோதும் அப்படம் எனக்கு துளி சலிப்பையும் ஏற்படுத்தியதில்லை. வசீகரமான மாய கனவொன்றில் நுழைந்து சிறிது நேரம் உலாத்திவிட்டு மனமொப்பாது மீண்டும் இயல்புக்கு திரும்பும் உணர்வே ஒவ்வொருமுறை காட்ஃபாதரை பார்த்து முடிக்கும்போதும் எனக்கு ஏற்பட்டிருக்கிறது. “ஒரு திரைப்படம் முடிவடைகின்றபோது, அதன் மைய கதாப்பாத்திரத்திடமிருந்து விடைபெறுதல் என்பது மிகவும் துன்பகரமானது” என்ற புகழ்பெற்ற இயக்குனர் ஒருவரின் மேற்கோள் காட்ஃபாதர் திரைப்படத்துக்கு மிக கச்சிதமாக பொருந்தும். காட்ஃபாதராக திரையில் நடமாடிய மர்லன் பிராண்டோவின் சிறுசிறு அசைவுகளும் என்னை பெரிதும் வசீகரித்திருக்கிறது. மிகப்பெரிய மாஃபியா கும்பலொன்றின் தலைவனாக அறிமுகமாகி, தன் குடும்பத்தின் மீதான அன்பினால் இறுதியில் தனது கட்டுறுதி குலைந்து சிறுபிள்ளைப்போல அழுகின்ற பிராண்டோவின் முகம் இப்போதும் நினைவில் தங்கியுள்ளது. அல் பாசினோ – ராபர்ட் டி நிரோ என்ற மிகச்சிறந்த இரு நடிகர்களை அடையாளம் காட்டிய காட்ஃபாதர் திரைப்படம் உலகின் மிக முக்கியமான பல இயக்குனர்களையும் அதிக தாக்கத்து…

மெல்வில் எனது கடவுள் - ஜான் வூ தமிழில்: ராம் முரளி

குப்ரிக்கின் திரைக்கலை! – ஸ்காட் பெக்ஸ் தமிழில்: ராம் முரளி

1999ல் ஸ்டான்லி குப்ரிக் மரணத்தை தழுவி விட்டபின்பும், இதுவரையிலும் இருபது படங்களிலாவது அவருடைய பெயர் டைட்டில் கார்டில் தொடர்ந்து விழுந்துக்கொண்டுதான் இருக்கின்றது. உலகின் எண்ணற்ற இயக்குனர்கள் தங்களின் திரைப்படங்களின் மூலமாக தொடர்ந்து அவருக்கு நன்றி செலுத்திக்கொண்டும், அவரைப்பற்றிய படங்களை இயக்கிக்கொண்டும் இருக்கிறார்கள். அவரது திரைபாணி ஏற்படுத்திய வீரியமிக்க தாக்கத்தால், பல இளைஞர்கள் அவரது புகழை உலகம் முழுவதும் இன்றும் பரப்பி வருகிறார்கள். அவருடைய இறுகலான குறும்புத்தனம் நம்மை ஆடம்பர உணவகங்களுக்கும், சண்டைகளற்ற போர் அறைகளுக்கும், வான் வெளிக்கும் அழைத்து சென்று பரவசமடையவும், பதைபதைத்து நடுங்கவும் செய்திருக்கின்றது.

சினிமா சார்ந்த உரையாடல்களில் தவிர்க்கவியலாத, என்றென்றும் நிலைத்திருக்கும் புகழை அடைந்திருக்கிறது அவருடைய பெயர். பாரம்பரியமிக்க வணிக சினிமாவிலிருந்து முற்றாக விலகி அதிகம் சர்ச்சைக்குரிய சவாலான களங்களை மிகுந்த மேதமையுடன் கையாண்டு வரலாற்றில் என்றென்றும் நிலைத்திருக்கும் அழியா புகழை அடைந்திருக்கிறார் ஸ்டான்லி குப்ரிக்.

எல்லாவற்றையும் உற்று நோக்குங்கள…